விடுதல் இல்லா விருப்பு

நாளைய உலகு உனக்கென விரியும்
பொறுத்திடும் தருணங்களில் மனது மலரும்
நடப்பும் நிகழ்வும் உமக்கென தெரியும்
முதிர்வில் உனக்கென நிலமும் நெகிழும்

உலகுள இயற்கை உமக்கென உளதாகும்
உலகினுள் வேற்றுமை தெற்றன தெரிவதாகும்
உலகிது  எல்லோர் பொதுமையென கிடந்திடும்
விலக்கிடில் எப்படி மனமது நிறைந்திடும்

விரியும் விரியும் உறவுகள் விரியும்
அறிவோர் தெரிவர் அகமது மலரும்
அரிதில் கிடைப்பது அன்பெனத் தெரியும்
செறிவது இணைப்பே நாடொறும் நிலைக்கும்

சுடரும் சுடரும் ஒளிர்வென சுடரும்
சுருதி அடங்கிடாது நாடொறும் விளங்கும்
சுதந்திர உலகில் இன்பமே நிறையும்
இதந்தரும் இணைப்பே இயலுவ தாகிடும்

நாளை உலகினில் மாற்றம் நிகழ்ந்திடும்
நாட்டுவர் பொதுமை நாநிலம் செழித்திடும்
கொடுமை இல்லாக் குவலயம் நிறைந்திடும்
விடுதல் இல்லா விருப்பினில் செறிவோம்